احببته رغما ٤

فوضع حسام يده على جبينه قائلاً : اه صحيح... ازاي نست الموضوع دا ؟
فتنهدت نور قائله : انا كنت عارفه انك هتنسى علشان كدا جهزتلها مفاجأة.
حسام : بس انتي ازاي عرفتي ان النهاردة يبقى عيد ميلادها ؟
نور : احمد هو اللي حكالي.
حسام : احمد !
نور : ايوا.
عوده في الزمن .......
كانت نور في منزل امها وكانت تصنع الحلوى لاحمد فنظرت اليه وقالت : انت مبسوط يا حبيبي ؟
احمد : ايوا.

فابتسمت نور قائله : يبقى انت لازم تاكل كل الكيك اللي عملتهولك اتفقنا.
احمد : انا مش عايز اكلهم.
نور : متخفش... بباك مش هيعرف وانا مش هقولو.
احمد : لاء انا مش عايز اكلهم مش لاني خايف من بابا... بس انا عايز اديهم لعمتو منى لان النهاردة يبقى عيد ميلادها.
نور : بجد ؟؟
احمد : ايوا.. انا اعرف ان النهاردة يبقى عيد ميلادها وانا متأكد ان ماحدش في البيت فاكر الموضوع دا.

فابتسمت نور قائله : يا روح قلبي انت... عارف كدا احسن بكتير علشان نعرف نعملها مفاجأه حلوه وانا هطلب من النينه صباح تعملها تورته بالشوكولاتة وهنزين البيت كمان ... ايه رأيك ؟
فابتسم احمد وقال بحماس : ماشي.
عوده الى الواقع ......
نور : ماما عملتلها تورته لان احمد طلب منها تعمل كدا وانا جبت الشموع والبالونات علشان نعملها حفلة صغيرة وعايزاك تساعدني.
حسام : ايه العبط دا ؟؟ هي منى عيلة صغيرة علشان نعملها حفلة عيد ميلاد ؟

نور : انت ايه يا شيخ ؟؟ اول حاجة نسيت عيد ميلاد اختك الوحيدة ودلوقتي مش عايز تحتفل معاها في اليوم دا ! يا بجاحتك واللهي.
حسام : بقولك ايه... متستفزينيش لاني تعبان ومش عايز اتخانق معاكي دلوقتي.
نور : طيب خلاص... بلاش خناق النهاردة .
حسام : كويس.
قال ذلك ثم خلع سترته فقالت له : يلا تعالى علشان تساعدني في التزين قبل ما منى ترجع البيت .
فتنهد حسام قائلاً : عارفه انك مزعجة اوي ؟؟ اوكِ هساعدك.

فابتسمت نور قائله : يبقى انا هسيبك علشان تغير هدومك دلوقتي بس ما تتأخرش.
قالت ذلك ثم خرجت من الغرفة وبقي حسام وحده فقال بتذمر : ايه دا ؟؟ هو الواحد ما يقدرش يستريح في البيت دا ابداً ؟
قال ذلك ثم دخل إلى حجرة الملابس وبعد ان بدل ملابسه نزل لكي يساعد نور في التحضيرات ، وبينما كانا يعملان عادت السيده عائشه الى المنزل فوجدته مزين مما جعلها تسألهم : احنا عندنا حفلة النهاردة ولا ايه ؟

فألتفتت كل من حسام ونور اليها وابتسمت الاخيره قائله : اهلاً يا طنت.. احنا هنعمل حفلة علشان منى.
السيدة عائشة : منى !
حسام : ايوا يا ماما... انتي كمان نسيتي ان النهاردة يبقى عيد ميلادها مش كدا ؟
السيدة عائشة : اااه صحيح... ازاي نسيت اليوم دا ؟ انا حتى مجبتلهاش هدية !
حسام : مش انتي بس اللي نسيتي ... وانا كمان نسيت.
السيدة عائشة : ازاي نسينا عيد ميلادها ؟؟ اكيد هتزعل لما تعرف.