احببته رغما عني

الساعة السابعة والنصف مساءً ، عادت منى وأمها الى المنزل فسألت حليمة : هي نور فين يا حليمه ؟
حليمة : الست نور عيانه يا منى هانم وحسام بيه جابلها الدكتور النهاردة .
السيدة عائشة : يا ساتر استر يا رب ...طيب هي بقت كويسه دلوقتي ؟
حليمة : الدكتور اداها حقنه وان شاء الله هتبقى كويسه.
منى : وحسام فين يا حليمة ؟
حليمة : في المكتب يا هانم.
السيدة عائشة : طيب يا حليمة... تقدري تروحي علشان وتكملي شغلك.
حليمة : حاضر يا ست هانم.

قالت ذلك وغادرت اما منى فقالت : انا هروح اطمن على نور يا ماما.
السيدة عائشة : ماشي يا روحي... وانا هررح اتكلم مع حسام.
- ثم صعدت منى الى غرفة شقيقها ولكنها وجدت نور لا تزال نائمه ، اما السيده عائشه فذهبت الى غرفة المكتب ووجدت حسام جالساً ويقرأ بعض الأوراق فقالت له : ايه اللي حصل لنور يا حسام ؟؟ حليمة قالت انها كانت تعبانه النهاردة وانك جبتلها الدكتور.

فنظر حسام الى امه وقال : اه هي كان عندها سخونيه بس دلوقتي بقت كويسه.
السيدة عائشة : طيب الدكتور قال ايه ؟
حسام : هو قال انها لازم تستريح لغاية ما تخف.
السيدة. عائشة : احنا لازم نخلي بالنا منها كويس علشان الاشاعات متتكررش تاني ..وانت لازم تخليها تنام على السرير لاني متأكده انك سبتها تنام على الكنبة امبارح.
حسام : امال كنتي عايزاني اسيبها تنام جنبي يعني ؟

السيدة عائشة : انا مقصدش كدا... انت راجل يا حسام ولازم تبقى جنتل وتخلي البنت تنام على السرير وكان المفروض انك تنام على الكنبة بدالها .
فتنهد حسام وقال : خلاص..هسيبها تنام على السرير لغاية ما تخف.
السيدة عائشة : كويس.. ودلوقتي اقعد لاني عايزه اتكلم معاك في موضوع مهم بخصوص ابنك احمد .
حسام : احمد ؟؟ هو فيه حاجة ؟

السيدة عائشة : انت النهاردة غلط اوي يا حسام لما صرخت في وشو ونور قالت لو فضلت بتعاملو بالقساوه دي هو ممكن يحصلو انفصام شخصية وحالتو النفسيه هتبقى اسوء.
فاتسعت عينا حسام وقال : ايه ؟؟ انفصام شخصيه !!
السيدة عائشة : ايوا يا حسام... هي قالت ان دا ممكن يحصلو علشان هو في حالة اكتئاب نفسي ولو فضلت تتعامل معاه بقسوة فانت هتدمر الواد .

فجلس حسام وقال : انتي عارفة انا بعاملو كدا ليه يا امي...وانا عارف اني غلطان بس مش قادر اتقرب منو لان عينيه شبه عينين الخاينه وكل ما ابصلو افتكر هي عملت فيا ايه.
فاقتربت السيدة عائشة من ابنها ثم اخذته في حضـ,,ـنها قائله : متخليش ابنك يكرهك يابني....هو ملوش ذنب في اللي حصل ولو فضلت تتعامل معاه بالشكل دا فانت اكيد هتخسرو.
فنزلت دمعة حسام وقال : انا تعبان يا امي... مش عارف اعمل اي حاجة.

فابعدته السيدة عائشة عنها قليلاً ثم امسكت وجهه بكلتا يديها ومسحت دمعته قائله : روح طيب خاطرو يا حسام.. دا ابنك وملوش حد غيرك في الدنيا دي كلها.
فنهض حسام وقال : خلاص...انا هروح اكلمو دلوقتي.
قال ذلك ثم خرج من غرفة المكتب وصعد الى الاعلى... فتوجه نحو غرفة احمد ثم وقف امام باب الغرفة متردداً من الدخول ولكنه دخل في النهاية فوجد ابنه جالساً بالقررب من النافذة ينظر من خلالها الى المطر المتساقط في الخارج.