وش تاني

بعد ما قفلت التليفون مع رياض بصت لقت سليم لسه باصصلها وهو زعلان فابتسمتله وقالت : الولاد الحلوين ماينفعش يزعلوا من مامتهم
سليم بزعل : والامهات الحلوين مايخرجوش من غير ولادهم
أميرة : بس انا ماخرجتش ، انا كنت بشترى طلبات البيت ، وانت عارف انى ببقى ملخومة بالشنط اللى ببقى شايلاها ومابعرفش اخد بالى منك
سليم : مانا كان ممكن استناكى فى العربية

أميرة : لا طبعا ماينفعش ، وعلى فكرة كان ممكن اخد حد من اخواتك معايا ، بس مارضيتش عشان انت لما تصحى تلاقيهم هم الاتنين معاك
هادى جه من برة وقاللها : ماما ، هو بابا مسافر تانى ، انا سمعتك بتتكلمى عن تحضير شنطة
أميرة وهى بتحاول تبقى عادية ومايبانش عليها انها متضايقة : ايوة ياحبيبى مسافر بالليل ان شاء الله
هادى : وهيقعد اد ايه
أميرة : بيقول اربع ايام
هادى : معنى كده انه ممكن مايسافرش معانا زى ما وعدنا

أميرة بتفكير : ماسألتوش ياهادى
هادى : طب عاوزين نعرف
أميرة : لما ييجى ياحبيبى ان شاء الله نبقى نسأله
أميرة ابتدت تحضر الغدا وبعد ماخلصت دخلت اخدت شاور تانى وغيرت هدومها ، وابتدت تحضر الشنطة لرياض ، وبعد ما خلصت كان معاد رجوعه من الشركة ، بس اتاخر عن معاده واللى بقى طبيعى وعادى بالنسبة لأميرة وللولاد كمان ، فكلمته تسأله عن سبب تأخيره فرد عليها باختصار شديد جدا : معلش يا أميرة انا هعدى من تحت ، خلى البواب ينزللى الشنطة

أميرة باستنكار : مش هتطلع حتى تسلم على الولاد
رياض : معلش ، سلميلى انتى عليهم عشان ما اتأخرش على الطيارة
أميرة باحباط : طب هادى كان عاوز يكلمك
رياض بتنهيدة : ماشى هاتيه
هادى اخد التليفون من اميرة وقال : أيوة يا بابا ازيك
رياض باستعجال : ايوة ياهادى ، خير ياحبيبى
هادى : كنت عاوز اسأل حضرتك ، ان كنت هتسافر معانا زى ما وعدتنا
رياض وهو بينفخ : انا عندى شغل مهم ياحبيبى ، وانتم ماما معاكم .

. وخلى ماما تنده للبواب ياخد الشنطة احسن هتأخر ، ياللا سلام
هادى ناول التليفون لأميرة وقاللها : خلى البواب ينزل له الشنطة ، وسابها وراح قعد فى مكانه زى ماكان
اميرة مابقيتش عارفة تعمل ايه ، بس ندهت على البواب اديتله الشنطة ووقفت ورا الشباك لحد ماشافت عربية رياض جت تحت العمارة والبواب حطله الشنطة فى شنطة العربية ، بس لما رياض مشى بالعربية لمحت طفلة صغيرة عمرها حوالى خمس سنين قاعدة فى العربية من ورا

أميرة استغربت جدا ، لانها عارفة ان الطفلة دى بنت شهيرة صاحبتها ، واللى اتوسطتلها انها تشتغل فى شركة رياض من حوالى سنتين بعد ما جوزها اتوفى ، وكانت حالتها المادية مش اد كده ، و رياض وافق واخدها اشتغلت فى السكرتارية ، بس ايه اللى جاب بنت شهيرة فى عربيته ، وخافت لا تكون شهيرة حصللها حاجة ورياض ما اهتمش انه يبلغها ، فقررت تتصل بيها تتطمن عليها ، لكن لما كلمتها .

. مارديتش عليها من اول مرة ، لكن لما ردت عليها بعد كده
شهيرة : ايوة يا أميرة ازيك يا روحى وحشتينى
أميرة لاحظت ان شهيرة صوتها كويس فاتكلمت عادى وقالتلها : ازيك انتى ياشهيرة اخبارك أيه
شهيرة : انا بخير ياروحى ، انا عارفة انى مقصرة معاكى بقالى فترة ، بس معلش ، سامحينى ..اصل جودى كانت تعبانة بقالها فترة