احببته رغما عني بقلم نونا مصري.

.. انا اسفه مره تانيه وبتمنى انك تسامحني في يوم من الأيام "

فأقتربت منى من اخيها وقالت : حسام... متعملش في نفسك كدا ياخويا ، دي بانت على حقيقتها واتضح انها خاينه وكمان اخدت مبلغ بقيمه خمسة مليون دولار قبل ما تهرب .
السيدة عائشة : ايوا ، انا اتحققت من الموضوع دا بنفس... هي سحبت الفلوس امبارح قبل ما تسيب البيت.
فنهض حسام وقال : انتوا بتكدبوا ، مراتي حبيبتي متعملش حاجة وحشة زي دي... هي مستحيل تسيبني بالبساطة دي لأنها بتحبني اوي زي ما انا بحبها .

قال ذلك وخرج من من المنزل ، اما منى فلحقت به واخذت تناديه : حسام ...حسام انت رايح فين ؟
ولكنه لم يجبها ، بل صعد في سيارته وانطلق بها بأقصى سرعه ، فعادت الى الداخل وقالت لأمها وهي تبكي : الحقي حسام يا ماما... دا ركب العربيه وطلع بيها بسرعة ، انا خايفه عليه اوي !
فعانقتها امها وقالت : اهدي يا روحي ، هو اكيد محتاج يبقى لوحده دلوقتي.

قالت ذلك وحدثت نفسها قائله : اه يا رجاء يا حيه يا خبيثه... بعدما لمناكي من الزبالة تعملي فينا كدا ؟؟
عند حسام ....
* ذهب الى احدى النوادي الليلة وطلب مشروب قوي ثم جلس يشرب دون توقف ، اما في مكان اخر فكانت نور زين الدين تحتفل مع امها واختها وكان الشاب تيمور صديق لمى يحتفل معهن ايضاً فقالت لمى : نور اتفضلي يا حبيبتي ، دي هديتي ليكي.

قالت ذلك واعطتها علبه ، فأخذتها نور وعندما فتحتها ابتسمت وقالت : اه يا روح قلبي ..دا جميل اوي ، متشكره.
لمى : بما انك بقيتي ابله {معلمه} دلوقتي فلازم تلبسي زي الجزمة دي .
اما السيدة صباح فقالت : نور يا روحي وانا برضو جبتلك هدية ...اتفضلي يا حبيبتي.
كانت هدية الأم عباره عن قلاده مشابها تماماً للقلادة التي قام حسام بشرائها لزوجته ولكنها كانت مزيفه فأخذتها نور ثم أبتسمت وقالت : ماما دي جميله اوي... متشكرة يا حبيبتي .

السيدة صباح : انا عارفه انها مش السلسلة الأصلية بس دي بتعبر عن حبي ليكي ..بتمنى انها تعجبك.
فنهضت نور وعانقت امها قائله : يا روحي انتي.. دي عجبتني اوي وقيمتها بالنسبة لي اكبر من السلسلة الأصلية علشان كدا هفضل لبساها على طول.
اما تيمور فقال : ودلوقتي جيه دوري ، نور انا كمان جبتلك هدية ويا رب تعجبك.

- كانت هدية تيمور عباره عن حقيبة نسائيه مصنوعه من الجلد وكانت ذات ماركة Prada الشهيره ، فقالت نور له : تيمور ليه جبتها ؟؟ دي غاليه اوي.
فأبتسم تيمور وقال : مفيش حاجة تغلى عليكي ، قوليلي عجبتك ؟
نور : ايوا عجبتني اوي... متشكرة يا حبيبي.
لمى : قوليلي بقى يا نور... هو مهران ليه مجاش علشان يحتفل معانا بالمناسبة الحلوه دي ؟؟
نور : يمكن عندو شغل علشان كدا مجاش.
تيمور : نور انتي متأكدة ان الراجل دا بيحبك بجد ؟

نور : ايه السؤال العبيط دا ؟؟ طبعاً متأكدة.
تيمور : بس ليه مابيهتمش بيكي زي كل بقية الخلق .. بصراحة انا متهيألي انه مش بيحبك ابداً .
السيدة صباح : ايه اللي بتقوله يلاه ؟؟ هو انت بتفتنها على الراجل كدا ليه ؟
لمى : بصراحة يا امي تيمور عندو حق ، يعني لو كان مهران بيحب اختي فعلاً فكان على الأقل جيه واحتفل معانا النهارده والا انتي رايك ايه .
فقالت نور : تصدقوا عندكوا حق ...الأستاذ مكلفش نفسه يتصل بيا حتى.