احببته رغما عني بقلم نونا مصري.

فنظرت الاستاذة كوثر اليها ثم قالت : وعايزه تخرجي ليه يا استاذة نور ؟ دوامك لسه منتهاش ولازم تفضلي هنا علشان اجتماع الأساتذة اللي هنعملوا بعد الظهر.
نور : انا عارفه دا كويس بس امي تعبانه شوية والدوا بتاعها خلص واتصلت بيا علشان اروح اجيبهولها من العيادة.
فتنهدت الاستاذة كوثر وقالت : ماشي...تقدري تروحي بس اوعي تتأخري.
فابتسمت نور وقالت : متشكره جداً .

قالت ذلك ثم خرجت من المدرسه واوقفت سيارة اجره وعندما صعدت فيها قالت للسائق : اطلع ياسطا على مطعم *** بسرعة.
السائق : حاضر يا هانم.
- وعندما وصلت نور الى المطعم وجدت امها جالسه مع شاباً فتنهدت بقوة وأقتربت منهما ثم قالت : ايه اللي بتعمليه يا ماما ؟؟
فالتفتت السيدة صباح اليها ثم ابتسمت وقالت : اهلاً يا حبيبتي... انتي جيتي بسرعة !
فنظرت نور اليها بانزعاج وقالت : مهو انتي اللي طلبتي مني اجي بسرعة.

السيدة صباح : كويس انك جيتي ، اعرفك.. دا البشمهندس كمال وجيه النهاردة مخصوص علشان يتعرف عليكي يا روحي.
فنهض كمال ثم ابتسم بعدما رأى نور ومد يده ليصافحها قائلاً : ازيك يا استاذة نور ؟؟
فصافحته نور وهي تبتسم بتصنع وقالت : اهلاً يا بشمهندس.
ثم التفتت الى امها وقالت بصوت خافت : انتي كدبتي عليا وخليتيني اسيب شغلي بس علشان تعرفيني على الراجل دا ؟

فنهضت السيده صباح وقالت : متكبريش دماغك دلوقتي واقعدي علشان تتعرفي على الراجل وانا هرجع البيت لان عندي شغل كتير اوي.
قالت ذلك ثم التفتت الى المهندس كمال وابتسمت قائله : عن اذنك يا بشمهندس...انا هروح دلوقتي وانتوا اقعدوا اتكلموا مع بعد ولعله خير ان شاء الله.
كمال : مع الف سلامه يا طنت .
- ثم غادرت السيده صباح وتركتهما ، فقال كمال لنور : اتفضلي اقعدي يا استاذة.
فتنهدت نور ثم قالت : متشكره.
وعندما جلست سألها كمال : تحبي تشربي ايه ؟

نور : متشكره... مش عايزه حاجة.
كمال : زي ما تحبي.
نور : انا بعتذر نيابةً عن امي لانها عطلتك عن شغلك.
كمال : لا ابداً ، في الحقيقة انا اللي كنت عايز اتعرف عليكي علشان كدا جيت النهاردة وعندي امل اننا نتفق مع بعض.
فتنهدت نور وقالت بنبرة صوت جادة : اسمعني يا استاذ كامل..
فقاطعها كمال بقوله : لا مؤاخذة بس اسمي كمال مش كامل.
نور : انا اسفه .
كمال : ولا يهمك...كملي كلامك.

نور : بصراحة انا مش عايزة ارتبط دلوقتي علشان كدا انا شايفة اننا مش هنتفق مع بعضنا ابداً .كمال : هوا انتي شايفة اني مش مناسب ليكي ولا علشان انتي معحبتيش الطريقة اللي اتقابلنا بيها ؟نور : في الحقيقة انا مش عايزة اتجوز خالص وانت ملكش ذنب في الموضوع دا ابداً .- وبينما كانت نور جالسه تتحدث مع كمال كان حبيبها السابق الصحفي مهران جالساً مع صحفي اخر في نفس المطعم فقال للرجل الذي كان جالساً معه : لو لاقيت اي معلومه جديدة متعلقة بحياة حسام الشناوي انت لازم تقولهالي بسرعة.