احببته رغما عني بقلم نونا مصري.

نور : انا مقدرش اقول اي حاجة دلوقتي بس هحاول على قد ماقدر اني اتقرب منه وابقى صاحبته ومش المعلمة بتاعته وبكدا هو ممكن هيحس بالراحة اكتر.
منى : وانا هعتمد عليكي في الموضوع دا.
نور : بس هنعمل ايه مع اخوكي يا هانم ؟ انتي شفتي ازاي بهدلني قدامكوا ومش عايزني اقرب من احمد خالص.
منى : متقلقيش... انا هتكلم معاه وان شاء الله هنحل المشكلة دي.
فتنهدت نور وقالت : ماشي.

منى : ممكن اعرف انتي عندك كام سنه ؟ بصراحة الفضول هيــ,,ـني على ما اعرف.
فابتسمت نور وقالت : انا عندي 29 سنه.
فابتسمت منى وقالت : بجد ؟؟ ايه الصدفة الحلو دي ؟ وانا كمان عندي 29 سنه.
نور : بجد ؟ والله مش باين عليكي خالص وبصراحة افتكرتك اصغر مني.
فضحكت منى وقالت : مش للدرجة دي.
نور : لا والله انا بتكلم جد.. انتي باين عندك 27 سنه.
منى : ربنا يخليكي.. ايه رآيك نبقى أصحاب ؟؟ بصراحة انتي دخلتي على قلبي زي العسل.

نور : دا شرف كبير ليا يا منى هانم لاني حبيتك من كل قلبي والله.
منى : يبقى اتفقنا...وبما اننا بقينا اصحاب دلوقتي يبقى بلاش نتعامل مع بعض بطريقة رسمية يعني تقوليلي بس يا منى وبلاش هانم دي وانا هقولك نور من غير استاذة.
فضحكت نور وقالت : اوكِ .
منى : بس ايه دا ؟ بسم الله ما شاء الله انتي قمر منور يا نور.
نور : ربنا يخليكي دا انتي اللي عسل والله على عكس اخوكي الرخم.

فضحكت منى وقالت : تعرفي انك اول وحده بتتكلم مع حسام بالشكل دا ؟ هو عمره محدش كلمه زي ما انتي عملتي.
نور : انا اسفه على اللي هقوله بس اخوكي يا منى رخم اوي وانا مش طايقه خالص.
منى : بس بذمتك مش يجنن ؟؟
فشردت نور قليلاً وتذكرت ملامح حسام ثم قالت : ااا.. ايوا هو شكله حلو بس لسانه بينقط سم ودماغه مقفله .
فضحكت منى وقالت : اوعي يسمعك لحسن هيعمل مصيبه.

نور : لا متخفيش مش هيسمعني لاني هرجع البيت دلوقتي.
منى : بالسرعة دي ؟؟ طب خليكي تتعشي معانا.
نور : بالافراح ان شاء الله بس مينفعش اسيب امي واختي لوحدهم في البيت.
منى : طيب زي ما تحبي.. يبقى انا هوصلك.
نور : لا ملوش لازمة.. انتي باين عليكي مشغولة اوي علشان كدا هروح لوحدي.
منى : براحتك.
نور : عن اذنك دلوقتي.
منى : مع الف سلامة.
* ثم نزلت نور الى الأسفل وقالت للسيدة عائشة : انا همشي دلوقتي يا ست هانم .

السيدة عائشة : وهترجعي بكرا مش كدا يا بنتي ؟
نور : ايوا يا هانم....انا اتكلمت مع الأنسة منى وحلينا المشكلة.
فابتسمت السيدة عائشة وقالت : الحمد لله.. هخلي السواق يوصلك.
نور : مفيش داعي انك تتعبي نفسك.. انا هروح لوحدي.
علي عائشة : براحتك يا بنتي.
فابتسمت نور وقالت : تصبحي على خير.
السيدة عائشة : تلاقي الخير.

- ثم غادرت نور منزل حسام وهي تتمتم وتقول : ايه العيلة الغريبه دي ؟؟ الست عائشة عسل ودمها خفيف وبنتها منى دي حتت سكرة بس الراجل اللي اسمه حسام دا طلع رخم اوي ومنزليش من زور !
وعندما خرجت من البوابة رأها الصحفي مهران الذي كان جالساً في سيارته بالقرب من منزل عائلة الشناوي من اجل مراقبة حياة حسام الشخصية ، فأندهش عندما رأها وقال : نور ! ايه اللي بتعمله البنت دي هنا ؟؟ معقول تكون على علاقة مع حسام الشناوي ؟