انتقام الاخ حكايات مني السيد

مريم غمضت عينيها، وخدت نفس عميق… أول نفس نضيف تحس بيه بيدخل رئتها من يوم ما أبوها وأمها سابوا الدنيا. حست كأن هم تلت سنين كان متكوم على صدرها واتشال بضغطة زرار. الكسرة، الإهانة، كلمة بهيمة اللي كانت بتسمعها كل يوم، ريحة البانيه والزيت اللي كانت بتتحرق بيه وهي بتخدم ناس معندهمش شرف ولا أصل… كل ده اتداس عليه تحت الجزم الليلة دي.

عدى تلت شهور على الليلة دي. القاهرة في شهر مارس كانت في أحلى أوقاتها. شمس العصر كانت دافية وبتدخل من شباك بلكونة مصر الجديدة، متنقية بستارة بيضا شيفون خفيفة بتتهز مع النسمة الهادية. الشقة كانت اتغيرت تماماً. العفش القديم بتاع حنان اللي كان مالي الصالة كآبة اتشال كله واترمى، الحيطان اتدهنت بلون أوف وايت مريح للعين، والسجادة التبريزي بتاعة مامتهم كانت اتغسلت ورجعت لمعتها كأنها لسه طالعة من الأتيليه.

وعلى الترابيزة اللي في النص، كانت محطوطة فازة ورد بلدي أحمر ريحته فايحة في البيت كله، جنب صورة كبيرة للمهندس شريف وطنط هدى وهما بيضحكوا. مريم كانت واقفة في المطبخ. المطبخ كان نضيف وبيلمع، مفيش زيت مغلي ولا قهر. كانت بتصب شاي بنعناع في مجين بورسلين شيك، وبتضحك وهي سامعة صوت مزيكا هادية جاية من الصالة؛

أسطوانة قديمة لأم كلثوم كانت مامتهم بتحبها زمان. طلعت برة بالصينية، كان طارق قاعد على فوتيه مريح، لابس قميص كاجوال كحلي وباصص في اللاب توب بتاعه. شاي بنعناع يا باشمهندس؟ مريم قالتها بابتسامة صافية، وشها كان رجع لونه الوردي، وعينيها بتلمع بالحياة من تاني. الهالات السودة اللي كانت تحت عينيها اختفت، وقصة شعرها الجديدة كانت مخلياها تبان بنت عندها خمسة وعشرين سنة مش تلاتين. طارق قفل اللاب توب وابتسم تسلم إيدك يا ستي.

هو في أحسن من شاي مريم في بلكونة بيتنا؟ مريم قعدت قدامه، وحطت رجل على رجل براحة واسترخاء قولي بقى، إيه آخر أخبار المحكمة؟ الأستاذ فريد كلمك النهاردة؟ طارق مسك المج ورشف رشفة، وقال بنبرة مليانة هدوء ونصر فريد باشا لسه قافل معايا من نص ساعة. محكمة جنايات شمال القاهرة أصدرت حكمها النهائي النهاردة في الشق الأول من القضية.

مريم بصتله بتركيز حكموا بإيه؟ عاصم المنياوي خد خمستاشر سنة سجن مشدد مع الشغل والنفاذ، وغرامة مية وخمسين مليون جنيه ومصادرة أصول شركاته كلها. وهشام خد عشر سنين سجن مشدد پتهمة التزوير واستعمال محرر مزور والرشوة والاشتراك في إخفاء أدلة جنائية. وطبعاً، حكم الطلاق للضرر بتاعك صدر الأسبوع اللي فات ومعاه صيغة تنفيذية كاملة بمؤخر الصداق والنفقة والمتعة وحقك في الشقة اتسجل في الشهر العقاري باسمك وباسمي بقرار قضائي غير قابل للطعن.

مريم سكتت لحظة، بصت لصورة أهلها اللي على الترابيزة، وقالت بهمس وأمه وأخته؟ طارق ضحك بسخرية خفيفة أمه شقتها القديمة اللي في المطرية اتفتحت ورجعوا يقعدوا فيها بعد ما اتفضحت ڤضيحة السنين في العمارة هنا وفي منطقتهم. شيماء خطيبها سابها أول ما اسم أخوها نزل في الجرايد، وحنان بتلف على المحاكم والمحامين تشحت عشان تقدم نقض ومحدش راضي يمسك القضية لأنها خسرانة ومقفولة بالضبة والمفتاح.