"واتجوزت واحد تاني." "وبعدين؟" "اتطلقت." "وظهرت تاني في حياته." هزت راسها."من سنتين." قلت: "وهو كان على تواصل معاها طول الفترة دي؟" "أيوه." سكت. قلت: "يعني كل مرة كنت بشوف اسمها…" "كان في سبب." "وكل مرة يقول شغل…" "كان جزء منه شغل." بصيت بعيد. ثم سألت: "هو كان ناوي يرجعلها؟" سارة ما جاوبتش. وده كان جواب.--- في الليلة دي أحمد اتصل. ما رديتش. اتصل تاني. رديت. قال: "مريم، لازم نتكلم.
" "اتكلم." "مش على التليفون." "قول." "نادين رجعت لحياتي قبل ما أعرف إنك حامل." سكت. كمل: "هي كانت محتاجة مساعدة في مشروع." قلت: "وإنت ساعدتها." "أيوه." "وخبيت عني." "عشان ما يحصلش مشاكل." قلت: "المشاكل حصلت بسبب الكذب." سكت. قال: "أنا غلطت." "بس؟ " "بس إيه؟" "هل كنت عايز ترجع لها؟" طول في السكوت. قلت: "أحمد." قال: "مش عارف." ضحكت."دي أسوأ إجابة." "كنت متلخبط." "وأنا؟" "إنتِ مراتي." "وده كان المفروض يخليك تعرف." سكت.
قلت: "إنت عارف إيه أكتر حاجة وجعتني؟" "إيه؟" "إنك ما خنتنيش بس في مكان… إنت خذلتني في موقف. " "مريم…" "كنت في المستشفى." سكت."أنا كنت بخاف أمـ,ـوت." صوته انخفض."أنا آسف." "وبنتك كانت بتصارع عشان تعيش." سكت."وإنت كنت في باريس مع واحدة كنت بتحبها زمان." قال: "ما حصلش بينا حاجة." قلت: "يمكن." "يعني إيه يمكن؟" "يعني حتى لو ما حصلش، اللي حصل كفاية. " قفلت.--- بعد شهر تقريبًا، خرجت ليان من الحضانة.
اليوم ده كان أجمل يوم في حياتي. شلتها لأول مرة من غير أجهزة كتير حواليها. كانت خفيفة. لكنها كانت حقيقية. بنتي. فضلت أبص في وشها وأبكي. أحمد كان واقف بعيد. قال: "ينفع أشيلها؟" بصيتله. ناولتهاله. مسكها بحذر شديد. وكان واضح إنه خايف. قال: "أنا آسف يا ليان." بصيتله. قال: "بابا غلط." أنا ما علقتش. رجعلي بنتي. وفي طريقنا لبيت أهلي، سألني: "إنتِ ناوية تعملي إيه؟
" قلت: "مش عارفة." قال: "عايز أرجعك." بصيتله."الرجوع مش قرار طرف واحد." "أنا مستعد أعمل أي حاجة." "الحقيقة." "إيه؟" "عايزة أعرف كل الحقيقة." سكت. قلت: "من غير جزء ناقص." هز راسه."هقولك." --- بعد يومين جه أحمد بيت أهلي. قعد قدام أبويا وأمي. وأنا كنت قاعدة قدامه. قال: "أنا ونادين كنا مخطوبين من زمان. " أبويا بصله."ليه ما قلتش لمريم؟" قال: "لأني كنت خايف." أبويا قال: "من إيه؟" "من إنها تفتكر إني لسه بحبها." بصيتله.
"وإنت كنت؟" سكت. أبويا قال: "جاوب." أحمد قال: "كان في جزء جوايا متعلق بالماضي." سكت البيت كله. أحمد كمل: "لكن أنا اخترت مريم." قلت: "بس ما قفلتش الباب." هز راسه."صح." قال أبويا: "طب وإيه اللي حصل في باريس؟" أحمد بلع ريقه."نادين طلبت مني أقابلها." "ليه؟" "كانت عايزة تبيع حصتها في الشركة." قلت: "وده كان محتاج خمسة أيام؟" قال: "الموضوع اتعقد." "إزاي؟ " "لأنها قالتلي إنها حامل." سكت. حسيت إن الأرض اتحركت.
النقاش
التعليقات والردود (0)
سجّل الدخول للمشاركة في النقاش. تسجيل الدخول
لا توجد تعليقات بعد — كن أول من يشارك رأيه.