بصمه بالاكراه حكايات مني السيد

اتفضلوا معانا بهدوء ومن غير شوشرة في المكان، الكلبشات جاهزة. الناس في الكافيه كلها لفت تبص، والموبايلات بدأت تصور والهمسات مالت المكان. حازم كان وشه بيسقط منه العرق كأنه تحت حنفية مية، ركبه خبطت في بعضها ومش قادر يقف على طوله، وبدأ يصرخ بهستيريا يا باشا أنا معملتش حاجة! دي مراتي! دي فلوس مراتي وهي اللي محولاها بمزاجها! الظابط مسكه من قفاه بصرامة ابقى قول الكلام ده لوكيل النيابة.. قدامي أنتي وهو!

اتكلبش حازم في إيد شاهيناز، ونزلوا وسط نظرات الاحتقار من كل اللي في الكافيه، واتحطوا في البوكس اللي كان واقف على الكورنيش. على الجانب التاني، فوزية كانت قاعدة في شقة التجمع مروقة بالها، مجهزة صينية شاي بلبن وكحك العيد، وبتتصل بقرايبها في التليفون أيوة يا أم إبراهيم.. لا متقلقيش العزومة اتأجلت بس عشان الواد حازم ربنا فتحها عليه وبقى شريك في شركة مالتي ناشيونال للأجهزة الطبية، وبكرة عازمكم في فندق خمس نجوم.. البت ندى؟

لا سيبك منها دي قاعدة في المستشفى بتتدلع، وخلاص أيامها في البيت ده بقت معدودة، البيت ده هيتكتب باسم ابني خلاص! وهي لسة بتقفل المكالمة، جرس الباب رن بقوة وعنــ,,ـــــف.. خبطات متتالية خلت فوزية تنتفض من مكانها إيه قلة الذوق دي! مين اللي بيخبط كده في العيد؟! فتحت الباب وهي قالعة طرحتها جزئياً ومتنرفزة، بس اتصدمت لما شافت قدامها اتنين أمناء شرطة، ووراهم صاحب العمارة اللي مأجر الشقة، وجنبهم المعلم بيومي بنصيته وصنايعية ورشة المناصرة واقفين بعربيات نص نقل!

فوزية رجعت خطوة لورا وهي مخضوضة فيه إيه؟! أنتوا مين وداخلين كده إزاي؟! صاحب العمارة طلع عقد الإيجار من جيبه وقال بنبرة ناشفة الست ندى صاحبة العقد الأصلي لغت العقد رسمي وفسخته النهاردة ودفعت الشرط الجزائي، ومعاها أمر تمكين بتسليم الشقة فوراً للمالك. وقدامك ساعتين تلمي هدومك الشخصية وتفضي الشقة دي خالص! فوزية صوتها شرخ وولولت شقة إيه اللي تتفضى يا مجانين؟

! دي شقة ابني حازم بيه! أنتوا بتتبلوا علينا ولا إيه؟! المعلم بيومي قرب منها، وبصلها باحتقار كان كفيل يدفــ,,ـــــنها مكانها حازم بيه بتاعك دلوقتي مشرف في حجز التجمع الخامس مكلبش مع العقروبة اللي كان بيسرق شقا مراته عشانها! والرجالة هنا جايين يفضوا العفش اللي ندى شرياه بدم قلبها من المناصرة، مسمار واحد من الشقة دي أنتي وابنك متملكوش فيه حق!

اطلعي بهدومك اللي عليكي بدل ما الحكومة تخرجك بالكلابشات بتهمة التحريض على سرقة فلوس الست ندى اللي كنتي بتعايريها بريحة الغِرا! فوزية ركبها سابت، ووقعت على الأرض في الصالة، شريط شريط اللي عملته في ندى عدى قدام عينيها ركوع ندى في المطبخ ووجعها، إهانتها ليها، المنديل المبلول اللي مسحت بيه صباعها، الكبر والغرور والافتراء على ست مظلومة شقيانة.

لقت نفسها بتلم عبياتها في كيس بلاستيك أسود زي المتسولين، والشارع كله واقف يتفرج عليها وهي بتخرج مكسورة العين، تركب ميكروباص راجعة لبيتها القديم المتهالك في أطراف الجيزة، بعد ما كانت بتتمنظر بشقة التجمع وعفش التجمع! في سرايا النيابة، كان المواجهة حاسمة. دخلت أنا والأستاذ عصام، ولقيت حازم قاعد على الأرض جنب الحيطة، هدومه متبهدلة وشه ممسوح بيه الأرض، وشاهيناز بتعيط بهستيريا وبتصرخ في وش وكيل النيابة والله العظيم هو اللي قالي إن الفلوس دي فلوسه وإنه داخل شريك بيها!