! اتنهدت وانا ببص بكره وكأنه واقف قدامي انا مش عايزه اعرفك تاني كان لسه هيتكلم بس انا قاطعته بأصرار مش عايزه اسمع صوتك ولا عايزه اعرفك تاني ورقمي امسحه من عندك وكل حاجه تخصني تمسحها انت سامع يامؤيد ! رد بغموض سامع تمام ياريمان قفلت في وشه وانا بتنهد بحزن وقهره فضلت علي حالي اكتر من نص ساعه قاعده ضامه ركبتي لصدري وشارده لابعد حد بتخيل حياتي الجديده واللي لحد دلوقتي مش عارفه هتمشي ازاي !
ياتري هعيش انا وبدر اخوات زي زمان ولا الوضع هيتغير ! طب حتي لو عيشنا اخوات وانا ربيت بنت اختي وكأنها بنتي التانيه انا هكون فين من كل ده هيكون فين حقي في حياه طبيعيه زوجه وزوج طبيعين مختارين بعض بكامل إرادتهم هكون ام حقيقيه هشيل بيبي من اللي بحبه في الحقيقه منكرش اني اتعلقت بمؤيد لكن معتقدش حبيته كان بالنسبالي مجرد شخص اهتم بيا سألني رايحه فين جايه منين اكلتي ايه هتصحي أمتي شخص حسيني اني مهمه ف اترسخ في فكري اني حبيته لكن في الحقيقه انا حبيت اهتمامه مش اكتر اعتقد لو اهتمامه مبقاش موجود مش هتمسك بيه أو هحبه لاني مش بحبه !
قومت بعد تفكير طويل اتوضي واصلي استخاره لاني عارفه أن ربنا هيريح قلبي وبالي زي كل وقت انا كنت محتاجه ارتاح وارتحت خلصت صلاه والغربيه أني حسيت براحه لا توصف قبل الصلاه كنت متشتته ضايعه في حيره وصراع بين قلبي وعقلي وحاليا انا حاسه اني مرتاحه اتنهدت وسلمت امري لربنا وفضلت مكاني لحد ما الباب خبط رديت بصوت هادي ادخل دخلت ماما وهي بتقرب مني بابتسامه حنينه زي قلبها ها ياحبيبتي هديتي !
ابتسمت بهدوء وانا برد عليها الحمد لله قعدت علي طرف السرير ومسكت ايدي بين ايديها وهي بتضغط عليها انتي عارفه أننا بنحبك انا وبابا صح عيوني اتملت بالدموع وانا بهز راسي عارفه مسحت دموعي بطرف صوابعها وهي بتكمل بهدوء وانتي بتحبي اختك الله يرحمها صح رديت بلهفه طبعا اتنهدت وهي بتكمل ابوكي عمل كده عشان هو خاېف بصيتلها باستغراب خاېف من ايه بصيتلي خاېف علي بنت اختك اتنهدت وانا بقول بغيظ بنت اختي مع باباها ياماما بنت اختي هيجرالها ايه ابوها هيخاف عليها اكتر من اي حد تاني ولو اتجوز واحده تانيه هتخاف عليها هتعاملها كويس يرضيكي بنت اختك تعيش حياتها مع مرات اب الله واعلم هتعاملها ازاي يرضيكي تتمرمط !
دموعي نزلت وانا بقول بدموع طب وانا ياماما انا مفكرتوش فيا ! انا ليه اتجوز جوز اختي ليه اخد الفضلات ردت بصدممه فض لات ! هزيت راسي بتأكيد ايوه فضلات انا من حقي زي ما هي عاشت اني اعيش زيها هي حبت واتحبت اتجوزت اللي بتحبه وخلفت منه هي عاشت حياتها زي ما بتتمني ومحدش فيكم اعترض محدش فيكم قدر يمنعها من حقها انما انا ليه تمنعوني انا من حقي ليه تمنعوني اعيش حياه طبيعيه زي بقيه البشر ليه تمنعوني احب واتحب واتجوز الشخص اللي قلبي هيرتاحله !
النقاش
التعليقات والردود (0)
سجّل الدخول للمشاركة في النقاش. تسجيل الدخول
لا توجد تعليقات بعد — كن أول من يشارك رأيه.