قلب لا يعرف2

امسك وجهها بكفيه واقترب منها:مش عايزك تخافى وانا موجود مش هخلى اى حد مهما كان يلمس شعرة منك
نظرت اليه خائفة ترتجف :يلا حبيبتى نطلع فوق اكيد خالى قالب الدنيا علينا
صعدا سويا وهى متشبثة به خائفة وهو يضمها بذراعيه حتى وصلا
فتحت لهم مريم الباب التى صعقت من حالة نور
مريم:ايه فى ايه مالها نور
ادهم:مش وقته ندخل بس
حضر ابواها ومازن وجدوهم على هذه الحالة

فكرى:ايه فى ايه مالك يانور ايه اللى حصل ياادهم
ادهم:خير ياخالى تستريح بس
اجلسها على الكرسى :مريم كوباية مية الله يخليكى
امل بخوف:طمنى ياادهم مالها نور
جلس بجوارها وهو مازال ممسك بيدها:نور معدتش تخرج من البيت تانى ياخالى ممكن
فكرى:افهم فى ايه
ادهم:فى ان يوسف الكلب كان مستنيها تحت فى بير السلم والله اعلم لو مكنتش دخلت وراها كان عمل فيها ايه
فكرى:لالا الواد ده اتجنن انا مش هسكتله تانى

ادهم:متقلقش انا هتصرف معاه بس زى ماقلت مفيش خروج تانى لحد معاد الفرح
نور:طيب وشغلى
ادهم بعصبية شديدة:يتحــ,,ـــــرق الشغل مفيش خروج يانورالا معايا او مع خالى او مازن غير كده لا
امل:طبعا مفيش خروج كفاية كده اوى
نور:يعنى ايه هتحبس بسبب واحد زى ده
امل :اومال تخرجى وياذيكى تانى
ادهم:انا قلت مفيش خروج لوحدك تانى ولا حتى الشغل
نور:بس ده مش اتفاقنا ياادهم ولا نسيت شرطى

ادهم:لا طبعا منستش بس برضه قلت مش لوحدك يعنى انا كل يوم الصبح هعدى عليكى وانا رايح الشغل
اشار الى مازن :تعالى معايا يامازن
فكرى:على فين
ادهم:هاروح القسم ابلغ عنه واعمل عليه تعهد بعدم التعرض لاى حد فينا
فكرى:طيب استنى هجى معاكم
ادهم:مينفعش خلى حضرتك معاهم مش معقول هنسيب البيت من غير راجل احنا مش هنتاخر يلا يامازن

بالفعل ذهبوا الى قسم الشرطة وقدم بلاغ ضد يوسف بعدم التعرض
بدوا تجهيز عش الزوجية الذى كان فى منزل العائلة كانت بداخل نور خوف ان لا ينفذ ادهم اتفاقه معها فى علاقتهم بعد الزواج ولكنه كان دائما ما يشعر بها وبخوفها ولكنه اراد لها ان تتاكد بالفعل لا بالقول
فى مكان اخر لم ناتى اليه بعد هنا شركات مروان الشناوى الد اعداء ادهم الذى خطف منه حبيبته السابقة نانسى ولكن زواجهم لم يستمر اكثر من عامين بعدما علم انها لاتستطيع الانجاب طلقها لكنها استطاعت ان تاخذ منه اموال كثيرة استثمرتها بعد ذلك فى احدى مراكز التجميل التى تمتلكه الان

كان يجلس فى مكتبه غاضبا فهو رجل يملك الكثير من الاموال والعقارات وعندما قرر ان يبنى قرية سياحية علم ان هناك قرية اخرى سيتم افتتاحها وستكون قريبة منه ولكنه يريد ان يكون الوحيد وبلا اى منافس
يدخل عليه رشاد مدير اعماله وذراعه الايمن فى كل اعماله
رشاد:صباح الخير مروان باشا
مروان:خير منين وانت مش عارف تشوف شغلك يارشاد
رشاد:ليه بس انا عملت حاجة غلط ولا قصرت فى حاجة