لما مرات جوزى الجديدة عرفت انى حامل عملت مشكله مع جوزى وقتها جه جوزى اتخانق معايا خناقه كبيره وبقى يقولى انى قاصده اعمل كده عشان اغيظها وانى لازم اكلمها واقولها انى مش حامل وإن قرايبنا فهمو غلط كلامه عصبنى جداً ورديت عليه بعصبيه ـ ايه المشكلة لما اكون حامل هو دى حاجة عيب واا حرام وافرض انى فعلاً حامل وقتها هتعمل ايه يعنى لقيته كلمنى بعصبيه اكتر ـ هتنزلى الطفل ده لو حامل انا أصلا كنت واعدها قبل الجواز انى ملمسكيش ومعنى إنك حامل انى اما كداب وبكدب عليهاعشان كده يا سهيله هتتصلى بيها دلوقتي وتقوللها انك مش حامل فضلت باصة له بصدمة مش مستوعبة اللي بيقوله، وحسيت إن الأرض بتلف بيا من البجاحة والقهر.
وقبل ما انطق بحرف واحد، لقيته قرب مني بخطوات سريعة وعيونه بتطق شرار، ومسك دراعي بعنــ,,ـــــف لدرجة حسيت إن عظامي هتتكسر في إيده. زعق في وشي بصوت هز أركان الشقة:ـ إنتِ فاكرة نفسك مين يا سهيلة؟! فاكرة إنك لما تحملي هتلوي دراعي ولا هترجعي لنفسك قيمة عندي؟ فوقي يا حبيبتي.. أنا لو عايز طفل يملى عليا حياتي، يبقى منها هي! عيل ييجي من الست اللي قلبي اختارها مش منك إنتِ!
إنتِ وجودك هنا أصلًا ملوش أي معنى غير لخدمة البيت وتربيه ابنك وخلاص، متعمليش فيها ست هانم وعايشة الدور. كنت بحاول أشد إيدي منه وأنا الدموع بتغلي في عيني، بس هو كمل كلامه بنبرة كلها سخرية واستهزاء يوجعوا في الصميم:ـ اسمعي الكلمتين دول وحطيهم حلقة في ودنك.. لو مسمعتيش الكلام ونزلتي البتاع ده ورجعتي كلمتيها واعتذرتي وقولتلهت انك مش حامل اصلا وان انا مالمستكيش من الاساس، قسماً بربي هاخد ابنك منك ومش هتشوفي وشه تاني، وهرميكي في الشارع بورقة طلاقك في نفس اللحظة!
ولا تكوني ناسية إن الواد ده هو السبب الوحيد اللي مخليكي على ذمتي لحد دلوقتي وقاعد في بيتي مستحملك؟!رمى إيدي باحتقار كأنه بيطرد حشرة من قدامه، وطلع تليفونه من جيبه ورزعه على الترابيزة قدامي وهو بيقول بنبرة باردة مليانة تهديد:ـ التليفون قدامك اهو.. ترفعي السماعة دلوقتي حالاً وتصلحي اللي هببتيه، يا إما تلمي هدومك وتطلعي من هنا بإيدك فاضية ومن غير ابنك، وساعتها فرجيني بقى الحمل ده هينفعك بإيه!
سحبت إيدي من على التليفون فجأة، ووقفت بضهري مفرود وعيني في عينه بكل ثبات. الصدمة والقهر اللي كانوا مسيطرين عليا اتحولوا لبرود تام لما شفت الرعب اللي مالي قلبه من زعل مراته الجديدة، لدرجة إنه مستعد يدوس على كل حاجة من غير حتى ما يتأكد من الحقيقة. بصيت له وضحكت ضحكة وجع ممزوجة بسخرية وقولت:ـ اطمن يا سيدي.
. ريّح نفسك وارتاح من التمثيلية والرعب اللي إنت عايش فيه ده. أنا مش حامل أصلاً! ولا في حاجة في بطني، وكل الحكاية إن عمتك شافتني دايخة وتعبانة شوية، فرمت الكلمة دي قدام الناس وفهموا غلط، والخبر وصل لست الحسن والجمال زي النــ,,ـــــار في الهشيم. ملامح وشه اتلخبطت وظهرت عليها علامات الدهشة وهو بيحاول يستوعب كلامي، بس أنا مسبتلوش فرصة ينطق وكملت بكل قسوة ووجع:ـ بس تعرف؟
النقاش
التعليقات والردود (0)
سجّل الدخول للمشاركة في النقاش. تسجيل الدخول
لا توجد تعليقات بعد — كن أول من يشارك رأيه.