كان كاتب في رسايله ليهم البروفة دي عشان نثبت إن الموديل ده يقدر يشتغل ويدير كل حاجة من خلال شخص واحد بس من البيت. أنا كنت الشخص ده.. حقل التجارب اللي شغال ببلاش، ومحدش كلف خاطره يقولي إني داخلة في تجربة! استنيت لحد يوم الاتنين الصبح أول ما شريف نزل الشغل. فتحت إيميلات شغلي وفواتيري، ولقيت الكارثة تلات رسايل من عميلين عندي، بيسألوا عن المنصة الجديدة اللي المفروض أنا رشحتهالهم!
واحد منهم كاتبلي بالحرف أستاذ شريف بلغنا إننا من أول الشهر الجديد هننقل كل الحسابات والفواتير على السيستم بتاعكم. حسيت بضربة في صدري نفسي اتكتم منها؛ العملاء اللي بنيت معاهم ثقة بالسنين مكنوش بيتعاملوا مع شريف صدفة، ده كان بياخدهم على الجاهز عشان يبقوا أول زباين في مشروعه الجديد! بالليل، حطيت العشا، وقعدت قدامه ورميت الكلمة في وشه مين نبيل فريد يا شريف؟ شريف ساب الشوكة من إيده وتنح.
في الأول أنكر وعمل نفسه عبيط، بعدين قال دي فكرة شغل في الشركة، ولما حاصرته بالكلام اعترف إن شركتهم عايزة تفتح قسم جديد وهو قدم فكرة مشروع إدارة حسابات أونلاين. على طريقتي وتفاصيل شغلي أنا؟ كنت واخد الفكرة من اللي بنعمله هنا في البيت! من اللي أنا بعمله يا شريف! ده انت متعرفش الفواتير بتتقفل يوم إيه أصلاً! ساعتها فهمت الجملة اللي رعبتني مين اللي هياخد مكانها..
مكنتش ست تانية، نبيل كان هياخد مكاني جوه السيستم وطريقة الشغل. شريف كان محتاج يثبت لشركائه إن السيستم هيمشي وينجح من غير ما يعتمد عليا، عشان كده كانت عزومة الغدا يوم الجمعة؛ كانوا جايين يتفرجوا على المكنة وهي شغالة وأنا طالع عيني في المطبخ وبرص السفرة وبضايفهم وهو حاطط رجل على رجل! يعني عازم صحابك وموقفني أخدمكم عشان تثبتلهم نظريتك؟ كنت عايزهم يشوفوا إن الهيكل شغال وعملي!
هيكل إيه؟! انت كنت بتخليهم يتفرجوا عليا وأنا بتفرم! شريف اتنرفز وزعق انتي بتخلطي الشغل بحياتنا! أنا كنت ناوي أدخلِك بنسبة لما المشروع يتقبل رسمي في الشركة! نسبة كام؟ سكت ومعرفش يرد. كام يا شريف؟! انطق! لسه مكناش حددنا! افتكرت ملف الإكسيل؛ خطة النقلة والبدائل كانت في أكتوبر عشان المشروع هيبدأ فيه؛ كانوا هيشيلوا عني عيالنا والبيت بأكل جاهز وشغالة عشان يفضولي وقت وأبقى موظفة عندهم!
كنت ناوي تشغلني عندكم بمرتب؟ أعمل نفس اللي بعمله لعملائي؟ بس على أوسع، وهتكبري! هنا الصورة وضحت في دماغي زي الشمس يثبتوا إن طريقتي تنفع تتنسخ، يلهفوا عملائي لحسابهم، وبعدين يرمولي وظيفة في الكيان اللي اتبنى على قفايا! بصيتله وسألته طب ونبيل كان محطوط مكاني ليه؟ شريف دور وشه في الأرض. سامح كان باعتلي سكرين شوت للهيكل الإداري نبيل مدير العمليات، وشريف مدير التسويق، وتحتهم اسم تالت هدى فاروق منسق حسابات.
وجنب اسمي كان مكتوب بخط صغير التعيين يتم بعد التنازل عن محفظة العملاء الخاصة بها. يعني إيه الكلمة دي يا شريف؟ شريف غمض عينه بقلة حيلة يعني العملاء بتوعك يتحولوا للشركة الأول. ولو كنت رفضت؟ سكوته طول زيادة عن اللزوم، لحد ما نطق بصوت واطي عشان كده كان لازم نتأكد إن السيستم هيشتغل من غيرك لو مكملتيش معانا. فهمت كل حاجة؛
النقاش
التعليقات والردود (0)
سجّل الدخول للمشاركة في النقاش. تسجيل الدخول
لا توجد تعليقات بعد — كن أول من يشارك رأيه.